काठमाडौँ। स्थानीय तह पुनःसंरचनापछि पहिलोपटक देशभरका नगरपालिका र गाउँपालिकामा निमित्त प्रमुख प्रशासकीय अधिकृतको सङ्ख्या शून्यमा झारिएको छ।सङ्घीय मामिला तथा सामान्य प्रशासन मन्त्रालयका अनुसार यसअघि १०५ नगरपालिका र ८६ गाउँपालिका निमित्त प्रमुख प्रशासकीय अधिकृतमार्फत सञ्चालन हुँदै आएका थिए। तर अब सबै स्थानीय तहमा दरबन्दीअनुरुप प्रमुख प्रशासकीय अधिकृत खटाइएका छन्।

सामान्य प्रशासनमन्त्री भगवती न्यौपानेका अनुसार यस कदमसँगै पूर्ण जिम्मेवारीसहितको प्रशासनिक नेतृत्व सुनिश्चित भएको छ। अवकाशको चरणमा रहेका कर्मचारीबाहेक, पारदर्शिता र कार्यकुशलतालाई आधार मानेर प्रमुख प्रशासकीय अधिकृत नियुक्त गरिएको बताइन्छ।मन्त्रालयका अनुसार अब बाह्य राजनीतिक दबाब, स्थानीय तहको मनपरी र कर्मचारी सरुवामा हुने बाह्य प्रभाव अन्त्य हुने विश्वास गरिएको छ। चक्रिय सरुवा प्रणाली सहज हुने, सुगम स्थानमै सीमित हुने प्रवृत्ति रोकिने र दुर्गम क्षेत्रमा समेत सेवाको पहुँच विस्तार हुने मन्त्री न्यौपानेले बताए।

उनका अनुसार प्रमुख प्रशासकीय अधिकृत खटाइसकेपछि यसअघि निमित्तलाई दिइएको आर्थिक तथा प्रशासनिक जिम्मेवारी स्वतः रद्द भएको छ। सहसचिव तहका अधिकृत खटाइनुपर्ने नौ उपमहानगरपालिका र एक महानगरपालिकामा चाँडै स्थायी प्रमुख प्रशासकीय अधिकृत पठाउने तयारी भइरहेको पनि मन्त्रालयले जनाएको छ।